![اجراءات التخلف التجنيد طااازة 20/9/2017]()
انا استفدت كتيييييييييير من المنتدي هنا والحمد لله خلصت اجراءات تخلف التجنيد بعد ما عديت ال 30 سنه ف قولت اكتب الخطوات لأنه اكيد في ناس كتييييير اكيد خايفه زي ما انا كنت خايف ومش مصدق اي حاجه وناسس بتقول ان القانون ممكن يكون اتغير او الغرامه ممكن تكون زادت قوي مع زيادة اسعار كل شيء حوالينا ..
يا جماعه انا من سوهاج وطبعا اجراءات تجنيدي في اسيوط المهم انك تكون عديت ال 30 سنه ولو حتي بيوم واحد ف انت مثلا روح بعد ال 30 سنه بشهر او اكتر شويه للأمان بس .. بعد كده كل اللي هتحتاجه هو :
شهادة ميلاد كمبيوتر بالرقم الثلاثي .. انت بتطلبها كده بالضبط ودي انا عملتها ب 30 جنيه
وبتحتاج طبعا بطاقة شخصية ساريه وشكرا كده ولا اي ورق تاني بتحتاجه
بتروح منطقة التجنيد اللي انت تابع ليها بدري شويه يعني انا مثلا كنت قدام البوابه عالساعه 8 صباحا
هيسألوك داخل ليه قول انك تخلف تجنيد وداخل تنهي موقفك
بعد ما تدخل علشان متعملش زيي وتتوه جوا اتجه علي طول علي الكانتين بتاعهم اشتري ملف ابيض فاضي هو اسمه كده ( ملف ابيض ) وده ب 1.50 جنيه ونص بس طبعا انا ضحكوا عليا الجماعه اللي برا بتوع التصوير وباعوهولي ب 10 جنيه هههههههههه بس مكنتش اعرف اكيد
المهم بتشتريه من الكانتين وتروح علي تسأل علي شباك اسمه الشؤون وهتقوله انك تخلف تجنيد هيسألك لو قدمت قبل كده قوله لا اول مره هيسألك عن الرقم الثلاثي بتاعك اديله شهادة الميلاد اللي معاك ياخد منها الرقم
بعدها هيديك ورقه من عنده ويقولك روح المجمع بيها في الشباك التابع ليك المجمع ده مبني في نفس المكان عندهم
بعد ما بتاع المجمع يعبيلك الورقه دي هيقولك ارجع تاني شباك الشؤون هترجعله وهيبعتك لشباك جنب منه تشتري دوسيه تخلف تجنيد ب 65 جنيه وتصور الورقه اللي انت كملتها في المجمع ده صورتين وبطاقتك صورتين وتحطهم في دوسيه التخلف ده وتروح بيهم لشباك الشؤون تسلمهم
شويه هينادي عليك يخليك تبصم علي اكتر من ورقه وهيديك وحده منهم فيها تاريخ اليوم اللي انت روحت فيه وفيها تاريخ المحاكمه بتاعك
انا روحت يوم 20 وكان تاريخ المحاكمه يوم 26 يعني مش بعيد ولا حاجه
هتروح بقي المحاكمه عالساعه 9 الصبح ان شاء الله تكون جوا
في المحاكمه مش بتحتاج اي ورق خالص انت بس خد معاك الورقه اللي فيها ميعاد المحاكمه والبطاقه الشخصيه وخلاص
هتدخل تسلم بطاقتك و15 جنيه علشان يثبتك عنده وتقعد بقي تستني مع الباقيين
انت وحظك بقي امتي تبتدي الجلسه انا عن نفسي استنيت اكتر من ساعتين
بعدها هيدخولكم كلكم القاعه ويتقفل الباب ويبتدوا بقي ينادوا عليكم بالاسم واحد واحد
مفيش حتي حد اتسأل انت مجتش ليه وبتاع لاااا .. تسمع اسمك ترد وتتجه ناحيته يبصلك كده بصه سريعه ويقدرلك الغرامه وترجع تقعد
انا عن نفسي وكل اللي كانوا معايه كان مجمل الغرامات مابين 3500 جنيه لحد 3800 جنيه لا اقل ولا اكتر من كده
وفكك من كلام الناس انك تلبس لبس قديم والحوارات الفاشله دي مش بتاكل معاه
روح بلبسك المعتاد واياك ثم اياك تاخد معاك محامي مع احترامي لكل الاخوه المحامين بس بصراحه مش بيتكلموا هناك حتي والغرامه بتكون زيك زي غيرك
هتلاقي هناك محامين جوا كل واحد مهم يقعد جنبك شويه يحاول يقنعك انه ممكن يجبلك غرامه اقل فكك منهم كلهم
بعد ما يحكم علي الكل يا ريس هتطلعوا ويدخلوكم مكان تاني ولاااااازم تكون الفلوس معاك لانك مش هتطلع من هناك غير وانت دافع
بالاسم برضه مجموعه مجموعه تروح تدفع الغرامه وترجع تاني لحد ما يخلصوا وبالاسم تروح تستلم بطاقتك وايصال الدفع وهتدفع حوالي 20 جنيه تاني وقت الاستلام وتروح تروح وترجع بعد 10 ايام تاخد صورة الحكم من نفس المكان بس عالبوابه من برا بايصال الدفع اللي معاك وتتجه بصورة الحكم بتاعتك للتجنيد اللي روحته الاول علشان الشهاده
انا لسه طبعا مروحتش لان ال 10 ايام لسه معدوش
اسف علي الاطاله بس حبيت اشارك كل التفاصيل علشان اللي خايف يروح ينهي موقفه يتطمن
اي استفسار انا حاضر.
